John Forbes Nash Jr.

Dr John Forbes Nash, Jr. (* 13. Juni 1928 z Bluefield, West Virginia; † 23. Mai 2015 in dr Nööchi vo Monroe Township, New Jersey) isch en amerikanische Mathematiker gsi, wo bsundrigs in de Beriich vo dr Spiiltheorii und dr Differenzialgeometrii und uf em Gebiet vo de partielle Differenzialgliichige gschafft het. Im Joor 1994 het er zämme mit em Reinhard Selten und em John Harsanyi dr Wirtschaftsnobelbriis für die gmäinsame Läistige uf em Gebiet vo dr Spiiltheorii überchoo. Dr Nash isch äine vo numen e baar Mathematiker, wo dä Briis überchoo häi. 2015 het er dr Abelbriis, äine vo de wichdigste Wüsseschaftsbriis uf em Gebiet vo dr Mathematik, überchoo.

Dr Nash isch im Alter vo drissgi an Schizofrenii chrank worde. Am Aafang vo de 1990er Joor het er sich vo dr Chranket erhoolt. Si Gschicht isch am Ändi vo 2001 eme bräitere Publikum dur dr briiskrönti Spiilfilm A Beautiful Mind bekannt worde.